இன்சிடியஸ் தொடர் பட வரிசையில் வந்திருக்கும் ஆறாவது படமாகும். ஆனால், ஒரு தனிப்படமாகவும் இதைப் பாவிக்கலாம். முந்தைய படங்களைப் பார்த்தே இருக்கவேண்டிய அவசியமில்லை.
ஃபர்தர் என்பது இறந்தவர்கள் வசிக்கும் இடமாகும். ஃபர்தருக்கும் பூமிக்கும் பயணிக்கக்கூடிய சக்தியைப் பெற்றவராக கெம்மா இருக்கிறார். அவரால் ஃபர்தரில் இருந்து ஒரு பொருளைப் பூமிக்கும், பூமியில் இருந்து ஒரு பொருளை ஃபர்தருக்கும் கொண்டு செல்ல முடியும். இதை அறிந்து கொள்ளும் ஃபர்தரில் வாழும் சைரஸ் எனும் கொடும் ஆத்மா, கெம்மாவின் உதவியோடு தன் பின்தொடர்பாளர்களுடன் பூமிக்கு நிரந்திரமாக வர நினைக்கிறது. அதனால் சைரஸ், கெம்மாவை ஆட்கொள்கிறது. எப்படி அதிலிருந்து கெம்மாவும், அவரது மகள் மாயாவும் தப்பிக்கின்றனர் என்பதுதான் படத்தின் கதை.
துர்கனவுகளால் பாதிக்கப்படும் கெம்மாவிற்கு உதவியாக எலைஸ் எனும் பாத்திரத்தில் லின் ஷயே நடித்துள்ளார். “இதைத்தான் நான் செய்கிறேன்” என ஃபர்தரில் இருந்து கொண்டு, சைரஸ்க்கு எதிராகக் கெம்மாவிற்கு உதவும் காட்சிகள் ரசிக்க வைக்கின்றன. பூமியில் எலைஸின் குரலாக டேட்டூ கடை நடத்தும் க்ளேர் எனும் பெண் உதவுகிறாள். க்ளேராக மெய்ஸி ரிச்சர்ட்ஸன் நடித்துள்ளார். கெம்மாவாக அமெலியா ஈவ் நடித்துள்ளார். இம்மூவரின் சிறப்பான ஒருங்கிணைப்பால், இறந்த பின்பும் ஒரு கல்ட் லீடராக வலம் வரும் சைரஸின் தீய நோக்கம் சாமர்த்தியமாகத் தகர்க்கப்படுகிறது.
இந்தப் படத்தை, பேய்ப்படம் என்று சொல்வதை விட, தன் மகளுக்கு ஓர் ஆபத்து நேரும்போது எப்படி அம்மா தன் மகளைப் பாதுகாக்கிறார் என்ற எமோஷநல் கனெக்ட்டை அதிகம் கொண்டுள்ள படமெனச் சொல்லலாம். முதல்முறையாக இன்சிடியஸ் படத்தொடரின் படத்தை இயக்கியுள்ளார் ஜேக்கப் சேஸ். இதுவரை வெளியான ஐந்து இன்சிடியஸ் படங்களின் புகழுக்கு இடையூறு ஏற்படாத வகையில் இப்படத்தைக் கரையேற்றி விடுகிறார். ஹாரரையும் எமோஷன்ஸையும் இணைக்கும் நேர்த்தியான கலவையாக இன்சிடியஸ் அசரடிக்கிறது.
